Tomo esta nova do xornal El Progreso creo que cómpre destacala:
Literatura
Os nenos de Timor Leste lerán 'A lingua das bolboretas' na súa lingua, o tetun
'A lingua das bolboretas', coñecida obra de Manuel Rivas, será traducida á lingua orixinaria de Timor Leste, o tetun. Será mediante unha edición bilingüe de portugués e tetun, ambas linguas cooficiais do país asiático. O libro foi ilustrado polo tamén galego Miguelanxo Prado e conta cun prólogo especialmente feito para esta edición polo Nobel da Paz e presidente da República de Timor Leste, José Ramos Horta.
Este libro está destinado a ser incorporado ao currículo escolar do país, como obra de lectura para todas as escolas de Timor, xa que un dos maiores problemas do seu sistema educativo é a ausencia deste tipo de material, polo que se distribuirá de xeito gratuíto. Ademais, será utilizado nas campañas de alfetización de adultos.
Será a primeira vez que a obra dun autor do Estado español se incorpore como libro de texto ao currículo escolar dun país asiático. O proxecto consta de dúas edicións, unha pimeira en tapa dura e unha segunda en rústica, esta última de 100.000 exemplares. Ademais, contén tamén unha guía didáctica para escolares.
